Vaziyat
Er-xotin 1990-yildan rasmiy nikohda boʻlgan, biroq 2019-yildan birga yashamagan va umumiy roʻzgʻor yuritmagan. Ajralish rasmiylashtirilmagan.
2023-yil aprelida ishonch bildiruvchimiz voyaga yetgan oʻgʻli bilan oʻz mablagʻlari hisobiga Toshkentda uy sotib olib, uni qayta qurgan. 2024-yil yanvarida turmush oʻrtogʻi vafot etgan va mol-mulkini vasiyat boʻyicha singlisiga qoldirgan. Singlisi uy nikoh davrida olinganini asos qilib, undan ulush talab qildi.
Biz nima qildik
Oila kodeksining 23-moddasiga koʻra nikoh davrida orttirilgan mol-mulk umumiy hisoblanadi. Biroq 27-modda istisnoni nazarda tutadi: oilaviy munosabatlar tugagan boʻlsa, alohida yashash davrida olingan mol-mulk har bir er-xotinning shaxsiy mulki deb topilishi mumkin. Shuni isbotlash kerak edi.
Xarid hujjatlari, mablagʻ manbalari, erning 2021-yildagi notarial arizasi va alohida yashash dalillari taqdim etildi. Hal qiluvchi dalil esa suhbatda tasodifan tilga olingan oilaviy janjaldan topildi: avvalgi ichki ishlar organlari tekshiruvi materiallarida qarshi tomon qarindoshlarining oʻzi er-xotin uzoq yillar alohida yashaganini aytgan edi. Bu ularning sudda egallagan pozitsiyasiga zid edi.
Natija
2025-yil 6-yanvarda Mirobod tumanlararo fuqarolik ishlari sudi daʼvoni qanoatlantirdi: umumiy maydoni 232,98 m² boʻlgan uy ishonch bildiruvchimizning shaxsiy mulki deb topildi. Sud qarorida ichki ishlar organlari materiallari er-xotinning uzoq yillar alohida yashaganini tasdiqlashi toʻgʻridan-toʻgʻri koʻrsatildi.
Ishonch bildiruvchining maʼlumotiga koʻra, qarshi tomon qarordan shikoyat qilmagan.
Material haqiqiy ish asosida tayyorlangan; ishonch bildiruvchilarning shaxsiy maʼlumotlari oshkor etilmaydi. Har bir ish individual: bitta ishning natijasi boshqa ishda xuddi shunday qaror chiqishini kafolatlamaydi.